यस अघिका गभर्नर महाप्रसाद अधिकारीको पाँचवर्षे कार्यकाल सकिएपछि उक्त पद रिक्त रहँदै आएको नेपाल राष्ट्र बैंकको गभर्नरमा डा. विश्व पौडेललाई सरकारले नियुक्त गरेको छ । मंगलबार बसेको मन्त्रिपरिषद् बैठकले पौडेललाई १८ औँ गभर्नरको रूपमा नियुक्त गर्ने निर्णय गरेको सरकार
का प्रवक्ता तथा सूचना तथा सञ्चार प्रविधिमन्त्री पृथ्वीसुब्बा गुरुङले जानकारी दिए ।
नेपाल राष्ट्र बैंक ऐनको दफा २५ मा नेपाल सरकारले गभर्नरको कार्यकाल सकिनु एक महिनाअघि नै नयाँ गभर्नर नियुक्त गरेर सार्वजनिक सूचना प्रकाशन गर्नुपर्ने प्रावधान छ । तर, सरकारले १० चैतमा मात्रै उपप्रधानमन्त्री तथा अर्थमन्त्री विष्णुप्रसाद पौडेलको अध्यक्षतामा प्रा. डा. विश्वनाथ पौडेल र विजयनाथ भट्टराई सदस्य रहेको सिफारिस समिति गठन गर्यो ।
त्यसअघि नै अर्थ मन्त्रालय मातहत पदाधिकारी नियुक्ति सम्बन्धी मापदण्डमा संशोधन गरेर ६५ वर्षमाथिका व्यक्ति पनि गभर्नरमा नियुक्त हुन सक्ने व्यवस्था गरेको थियो । त्यसपछि कुन चाहिँ ज्येष्ठ नागरिकलाई सरकारले गभर्नर बनाउने हो भन्ने शंका आए ।
नवनियुक्त गभर्नर प्रा. डा. पौडेललाई केन्द्रीय बैंकको विश्वसनीयता फिर्ता ल्याउने मात्रै जिम्मेवारी छैन, बैंकिङ क्षेत्रलाई ट्र्याकमा ल्याउने र अर्थतन्त्रलाई चलायमान बनाउने लगायत अनेक कामले कुरिरहेको छ ।
