निषेधाज्ञाको आदेश लम्ब्याउनका लागि काठमाडौँ उपत्यकाका तीन जिल्लाका प्रमुख जिल्ला अधिकारीहरुको बैठक आज दिउँसो १ बजेपछि बस्दैछ।
काठमाडौँका प्रमुख जिल्ला अधिकारी कालीप्रसाद पराजुलीले भने, ‘दिउँसो हामी बैठक बस्दै छौँ। अहिलेसम्मको निषेधाज्ञाको मुल्यांकन गरि अवधि थप गर्ने सम्बन्धमा छलफल हुनेछ। सम्भवतः अझै एक हप्ताका लागि निषेधाज्ञा थप हुनेछ र यो पटक थप कडाईका साथ लागु गरिने छ।’
अहिलेसम्म निषेधाज्ञाको कार्यान्वयन राम्रोसँग भएको बताउँदै उनले संक्रमण नियन्त्रणका लागि थप कडाईको तयारी रहेको उल्लेख गरे।
पछिल्लोपटक थप गरिएको निषेधाज्ञाको अवधि आउँदो बिहीबार राति सकिँदैछ। काठमाडौँ उपत्यकामा गएको वैशाख १६ गतेदेखि निषेधाज्ञा लागु भएको हो।
कोरोना भाइरसको संक्रमण तीव्र रुपमा बढ्न थालेसँगै निषेधाज्ञा लागु भएको थियो, त्यसको प्रभाव अहिले देखिन थालेको र संक्रमण दर केही कम हुने क्रममा रहेको सरकार तथा स्थानीय प्रशासनको दाबी छ।
