कोरोनाको कारण मनोरञ्जन क्षेत्र प्रभावित

काठमाडौं उपत्यकामा बैशाख २९ गतेसम्म निषेधाज्ञा जारी गरिएको छ । कोरोना संक्रमणदर र मृत्युदर निरन्तर बढ्दो छ । यस्तो अवस्थामा निषेधाज्ञा फेरि थपिने अनुमान अधिकांशले लगाएका छन् । कोरोनाको दोश्रो लहरका कारण नेपाली मनोरञ्जन क्षेत्र नराम्रोसँग प्रभावित भएको छ ।

निषेधाज्ञाको मारमा प्रशारण भैरहेका टेलिसिरियलहरु पनि परेका छन् । केही टेलिसिरियलको अझ केही भाग ‘स्टक’मा रहेपनि केही टेलिसिरियलको खिचिएको भाग प्रशारण भएर सकिएको छ । अब के प्रशारण गर्ने भन्ने अन्यौलमा यसका मेकरहरु देखिन्छन् । हाँस्य टेलिसिरियल ‘सक्किगोनि’ गत सातासम्म नयाँ भाग प्रशारण भएको थियो । यो साताका लागि प्रशारण गर्ने नयाँ भाग तयार छैन ।

बिज्ञापन

सिरियलका लेखक, निर्देशक तथा कलाकारसमेत रहेका कुमार कट्टेल भन्छन्– ‘अहिलेको विषम अवस्थामा छायांकन गर्न गाह्रो छ । यो साताबाट पुरानो भाग दोहो¥याउने सोचमा छौं ।’

‘सक्किगोनि’ हिमालय टेलिभिजनमा हरेक बिहीबार साँझ ८ बजे प्रशारण हुँदै आएको छ । अर्को हाँस्य टेलिसिरियल ‘मेरी बास्सै’ भने केही भाग ‘स्टक’ रहेको छ । निर्देशक दमन रुपाखेती अझै तीन साताका लागि पुग्ने भाग तयार रहेको बताउँछन् । उनले भने–‘तत्कालका लागि समस्या छैन । निषेधाज्ञा लम्बिदै गयो भने समस्या आउनसक्छ ।’ ‘मेरी बास्सै’ नेपाल टेलिभिजनमा हरेक बुधबार साँझ ८ः४५ बजे प्रशारण हुँदै आएको छ ।

सामाजिक विषयवस्तुमाथि निर्माण हुँदै आएको टेलिसियिरल ‘जुठे’पनि केही भाग ‘स्टक’मा छ । ‘हामीले गाउँमा खिच्नुपर्ने भएर ५–६ भाग एकैपटक खिच्छौं । निषेधाज्ञा हुनुअघि केही भाग खिचेका थियौं’ सिरियलका लेखक तथा निर्देशकमध्येका एक मरिचमान श्रेष्ठ भन्छन्–‘हामीलाई जेठभरीका लागि समस्या हुँदैन ।’ ‘जुठे’ हिमालय टेलिभिजनमा हरेक बुधबार साँझ ८ बजे प्रशारण हुँदै आएको छ । यसलाई मरिचमान र राजु पौडेलले लेखन तथा निर्देशन गर्दै आएका छन् ।

बिज्ञापन

यी दुई जनाकै लेखन तथा निर्देशन रहेको अर्को हाँस्य टेलिसिरियल ‘हल्का रमाईलो’ भने एक भाग मात्र ‘स्टक’ रहेको मरिचमानले बताए । ‘हल्का रमाईलो’ नेपाल टेलिभिजनमा हरेक आईतबार प्रशारण हुँदै आएको छ ।

‘आज आइतबारको भाग तयार छ’ मरिचमानले भने– ‘प्रशारण रोक्ने सोचमा त छैनौं । अर्को साताको लागि के गर्ने छलफल गर्दैछौ ।’ हाँस्य टेलिसिरियल ‘भद्रगोल’को पनि बाँकी भाग स्टकमा छैन् । गत शुक्रबारसम्म नयाँ भाग प्रशारण गरिरहेको निर्माण टिम आउँदो शुक्रबारदेखि के गर्ने भन्ने अन्यौलमा छ । ‘भद्रगोल’ नेपाल टेलिभिजनमा शुक्रबार साँझ ८ः४५ बजे प्रशारण हुँदै आएको छ ।

टेलिसिरियल ‘अति भो’को पनि नयाँ भाग प्रशारण भएर गत शनिबार नै सकिएको छ । हिजो शनिबार टेलिसिरियलको विगतका भागका राम्रा–राम्रा क्लिपहरु जोडेर प्रशारण गरिएको थियो ।

निषेधाज्ञा लम्बिँदै गए आगामी शनिबार पनि पुराना क्लिपहरु जाडेर प्रशारण गर्ने सोचमा आफूहरु रहेको निर्देशक सुरज खनालले बताए । यो सिरियल एनटिभी प्लसमा हरेक शनिबार साँझ ९ बजे प्रशारण हुँदै आएको छ ।

लकडाउन लम्बिदै गएको खण्डमा दर्शकले लोकप्रिय हाँस्य सिरियलका पुरानै भागहरु हेर्नुपर्ने वाध्यता देखिन्छ ।

ताजा
प्रदेश सरकार द्वारा पद्माेदयका ११२ जनालाई छात्रवृत्ति
जेष्ठ नागरिक भवन उदघाटन
पद्मोदयकाे वार्षिकोत्सबकाे अबसरमा खेलकुद सप्ताह सुरु 

संबन्धित समाचार

प्रदेश सरकार द्वारा पद्माेदयका ११२ जनालाई छात्रवृत्ति

जेष्ठ नागरिक भवन उदघाटन

पद्मोदयकाे वार्षिकोत्सबकाे अबसरमा खेलकुद सप्ताह सुरु 

एन.आई.एम.बि द्वारा क्युआर मर्चेन्टलाइ सम्मान