आफू संसदमा अल्पमतमा पर्ने देखिएपछि प्रधानमन्त्री एवम् नेकपा एमाले पार्टी अध्यक्ष केपी शर्मा ओली पार्टी भित्र लचिलो रुपमा प्रस्तुत भएका छन् । २७ गते संसदमा हुने विश्वासको मतदानमा पार्टी भित्रकै माधव नेपाल–झलनाथ खनाल पक्षले भोट नहाल्ने देखिएपछि प्रधानमन्त्री ओलीले सहमतिको लागि पहल सुरु गरेका हुन् ।
प्रधानमन्त्री ओलीले सहमति भएको खण्डमा यसअघि गरेका सम्पूर्ण कारबाही फिर्ता गर्ने गरी तयारी सुरु गरेका छन् । सोही अनुसार बिहीवार र हिजो दुई पक्षका नेताहरुकाबीचमा चरण, चरणमा छलफल भएको भए पनि सहमति भने हुन सकेको छैन । हिजो सामाजिक सञ्जाल फेसबुकमा स्टाटस लेख्दै नेता नेपालले प्रधानमन्त्री ओलीसँग कुनै पनि किसिमको सहमति नभएको प्रष्ट पारेका छन् ।
२७ गते बस्ने प्रतिनिधिसभा बैठकमा प्रधानमन्त्री ओलीले विश्वासको मत लिदै छन् । तर, काँग्रेस, माओवादी केन्द्र र नेपाल पक्षले विश्वासको मत दिन नसकिने प्रष्ट पारिसकेको छ । यता जनता समाजवादी पार्टीले भने हालको परिस्थितिमा पक्ष विपक्ष कतै पनि नलाग्ने गरी निर्णय गर्ने अन्तिम तयारीमा पुगेको छ ।
